علشان مين جاي تموت ؟؟؟؟

علشان مين جيت يا يسوع
من حفلة من اجلى لقلب داود

علشان آدم علشان حوا
اللي كسروا العهد وأكلوا
علشان أول أخ في دنيا
حسده لأخوه خلاه قتله
ولا سدوم ولا عاموره
علشان لوط ومراته وأهله
علشان عيسو وأخوات يوسف
والناس في زمن موسى يستاهلوا
علشان مين جيت يا يسوع
ليه تستحمل جلد السوط
علشان مين
جـــــاي تـمـــــــــوت

علشان مين جاي الدنيا
جاي تخلّص مين من النار
علشان شاول ولا داوود
ولا عشان شمشون جبار
علشان قاتل علشان حاسد
علشان حبة ناس أشرار
علشان شعب غليظ الرقبة
جاي تتعذب وبإصرار
علشان مين جيت يا يسوع
ليه راضي في سكون وسكوت
علشان مين
جـــــاي تـمـــــــــوت

علشان مين جاي تتجرّب
جاي تدوّر ليه على خروف
ولا عشان سامريّة مريضة
ولا عشان مفلوج ملهوف
ولا جيت علشان الأعمى
ويا ترى نظره خلاه يشوف
علشان بطرس ولا يهوذا
والباقي اللي جري م الخوف
علشان مين جيت يا يسوع
علشان أيه سيبت الملكوت
علشان مين
جـــــاي تـمـــــــــوت

علشان تينة مفيهاش ثمرة
ولا عشان تغسل رجلين
ولا عشان باراباس اللص
جاي تخلص لص يمين
جاي للصلب .. جاي للدقّ
جاي للحربة وشوك في جبين
جاي تتعذّب جاي تموت
مين يستاهل حبّك مين
علشان مين جيت يا يسوع
علشان أيه قبلت الصلبوت
علشان مين
جـــــاي تـمـــــــــوت

علشاني وعشان ملايين
علشان حبة ناس ضايعين
جاي تتحاسب وأنت بريء
وليه تدفع أنت الدين
حافضل أسأل نفسي وأجاوب
جاي تموت علشان مين
نفسي أستاهل أقول علشاني
وأفرح بيك قايم م الموت
وسؤال فاضل هزّ كياني
علشان مين جاي تموت
؟؟؟؟