شجرة معرفة الخير والشر والجديدة

دايما كنا بنسأل سؤال فلسفى هو " ليه ادم يغلط ونلبسها احنا " يعنى بمعنى
اخر انا مالى انا كمان كان لازم اخد فرصتى زيه
والسؤال ده انا بقول ان اللى بيسأله بيبقى ليه هدف من اتنين لا ثالث لهم
وقد يكون ليه الهدفين مع بعض

1 - تضييع الوقت وانه يشغل دماغه بأى هلفطة وخلاص

2 - يلاقى شماعة يعلق عليها كل غلطاته وكان الله بالسر عليم

انا هسيبكم مع القصة اللى جاية دى وبعدين نبقى نحكم...............

قصتنا النهاردة بدأت من عصور سحيقة جدا جدا بالتحديد من ايام قايين وهابيل
كلنا نعرف ان قايين كان بيزرع وهابيل كان بيرعى غنم ولما عمنا قايين ربنا
مقبلش ذبيحته وقبل ذبيحه اخوه
الدم غلى فى عروق سيادته وعمل فيها تسع رجاله فى بعض وقام على اخوه وقتله
لحد كده احنا عارفين القصة لكن انا بقى هقولكم اللى انتوا متعرفوهوش

دم هابيل اللى اتسفك على الارض ده وقع على بذرة عجيبة محدش يعرفلها اصل ولا
نوع البذرة دى بتنمو عادى جدا زى كل البذور وتكبر وتبقى شجرة لكن ليس لها
اى ثمار
وكان اول غذاء للبذرة دى هو دم هابيل

وكبرت شوية البذرة وبقت برعم صغير ولأن المنطقة دى شهدت حروب كتير بين
الناس اللى كان بيسميهم الكتاب اهل العالم فكان الغذاء الرئيسى للبذرة هو
الدم
متستغربوش دى الحقيقة كان كل غذائها بياجى من الدم

وانتوا عارفين طبعا ان الطوفان جه وغرق العالم كله واخفى اى مظهر من مظاهر
الحياة
لكن الغريب فعلاً انها كانت الشجرة الوحيدة اللى الطوفان مقتلهاش . بل
بالعكس دى نمت وكبرت اكتر واكتر وكانت جثث الناس اللى ماتوا فى الطوفان هو
سمادها

فضلت الشجرة دى تكبر وتكبر على مر العصور والازمان

ولأن المنطقة اللى هى فيها (منطقة العراق وما حولها ) كانت مكان حروب
العالم القديم كله
زى الفرس وبابل واشور والتتار والهكسوس وكل الشعوب القديمة
فكان غذاء الشجرة وهو الدم متوافر على مدار السنة

وزى ماانا بقول ممكن الانسان يبطل اكل لمدة اسبوع ويبطل يشرب يوم او اتنين
لكن مستحيل ان البشرية يعدى عليها لحظة بدون حروب وتصفيات جسدية
وكان يسود العالم مجاعات وقحط وجفاف لكن ده مش بيأثر على الشجرة دى لأن
غذائها متوافر طوال العام وطازج

الشجرة كبرت وكبرت وفروعها مدت جدا وتوغلت بشكل كبير لدرجة ان كان من
المستحيل انك تقطعها بفروعها
كان لازم عليك تقطع جزعها بس لأنك استحالة هتقدر تشيل الفروع
وبتحكى الاساطير ان فروعها وصلت للعالم كله

ما علينا

فى يوم من الايام جه وقت كان فى اتنين هيسكونوا فى الغابة اللى فيها الشجرة
دى وكانت البيوت ساعتها بتتبنى من خشب الشجر فاتخانق الاتنين على مين ياخد
الشجرة ويبنى بيها بيته وظل الخلاف قائم ومحدش قدر يقطعها وفضلوا بايتين
هما الاتنين فى الخلاء لحد ما جه دب واكل التنين وساب دمهم سايح جنب الشجرة
وكأنوا بيقدملها عشاءها فضلت الشجرة دى تتغذى على الدم والحقد وغباء البنى
ادمين

لحد ما فى يوم جه واحد قطع جذعها وعمله مركب صيد وكانت اول رحلة ليه فى
المركب ده هى اخر رحلة لأنه اتخانق مع ابن عمه الصياد وهما بيصطادوا مع بعض
وابن عمه ده قتله وسابه فى المركب وهرب وفضلت المركب سنين تايهه فى البحر
ومن نهر لنهر ومن مكان للتانى تحصد فى ارواح ناس

لحد ما رسيت فى يوم على احد شواطئ احد الانهار فى روسيا
وكانت ساعة الحرب العالمية التانية
وزى ما انتوا عارفين ان الالمان بقيادة هتلر كانوا محققين نتايج كويسة
ومحتلين اجزاء من روسيا
وكان فى معسكر روسى قابع فى غابة قريبة من النهر اللى رسى عليه المركب

وفى يوم مشئوم هجم الجيش الالمانى على المنطقة واستمر ضرب النار المتواصل
بين المعسكر الروسى والجيش الالمانى
لكن قائد المعسكر الروسى حس بالخطر وان المعركة مش فى صالحة بسبب ان فى
امدادات كتير بتيجى للالمان

فقرر انه ياخد اللى اتبقى معاه من جنود ويسيب المعسكر ويهرب وقبل ما يهرب
اتصل بالطيران الروسى واعطاه احداثيات الغابة علشان يقذفها وهرب هو وعشر
جنود اتبقوا معاه وفضلوا يجروا فى الغابة

وصل الجنود الالمان للمعسكر ولما بحثوا فى الجثث ملقيوش قائد المعسكر لقيوا
كل اللى ميتين لبسهم يوحى بانهم مجرد جنود فعرفوا ان القائد هرب فبعتوا
فرقة من عشرين جندى المانى علشان يمشطوا الغابة ويدوروا على الجنود الروس

نرجع بقى للقائد الروسى هو والعشرة اللى معاه فضلوا يجروا لحد ما وصلوا
لحافة النهر وكان لازم يعبروا للجنب التانى ومش هينفع يعوموا لأنهم كده
هيبقوا مكشوفين قوى للألمان
فلازم يلاقوا حاجة اسرع من العوم توصلهم الجنب التانى

فلقيوا مركب الصيد بتاعنا ( لو لسه فاكرينه) لكن كان فى مشكلة المركب ده
مياخدش غير اربعة بالكتير فيتصرفوا ازاى

اقولكم انا عملوا ايه . كل واحد راح مطلع مسدسه علشان يقتل زميله
اه متستغربوش كان شعارهم " المهم انا اعيش " وبعد المذبحة اللى حصلت وقتلوا
بعض لم يتبقى الا جندى واحد وقائد المعسكر وقبل ما يركبوا المركب
كان الالمان العشرين وصلولهم لأنهم سمعوا ضرب النار وقتلوهم

ووقف قائد الجنود العشرين الالمان وهو مستغرب وعمال يسأل :
احنا قتلنا اتنين بس طيب مين اللى قتل التسعة دول

وقبل ما يرجعوا تانى للقاعدة بتاعتهم شافوا الطيران الروسى وهو جاى
وده معناه انه هيقصف الغابة فلازم يهربوا من الغابة فيعملوا ايه يعملوا ايه

ملقيوش غير انهم يعدوا النهر بالمركب اياه وحصل بالظبط نفس اللى حصل قبل
كده ساعتها بس عرف القائد الالمانى مين اللى قتل التسعة

المهم مطولش عليكم بعد ما خلصت المذبحة دى لم يتبقى الا ثلاث جنود المان
وقبل ما يركبوا المركب كان الطيران الروسى وصل ونزل قنابل مسحت كل الجثث دى
وفضل المركب واقف مكانه شاهد على غباء 31 بنى ادم

.........

المركب ده وصل لأيد ميخائيل القائد العسكرى الروسى بعد سنين الحرب ما خلصت
وعلشان تعرفوا هو عمل بيه ايه لازم تعرفوا اسمه الكامل

القائد ده اسمه ميخائيل كلاشينكوف

اكيد دلوقتى عرفتوا هو صنع من خشب المركب ده ايه

صنع منه الرشاش اللى دخل التاريخ من اوسع ابوابه (الكلاشينكوف) او
AK47

ودخل موسوعة جينيس للارقام القيساسية كأكثر سلاح نارى انتشارا فى العالم

وللى ميعرفش ده اخف رشاش واسرع ومش بيتسد وعملى جدا

وزنه لا يتعدى الاربعة كيلوا ونص سهل الاستعمال جدا
والسلاح ده قتل اكثر من هيروشيما ونجازاكى مع بعض
واللى مش متأكد من كلامى يدخل يقرا عنه

وسعره مناسب وروسيا بتصدر منه بكميات ضخمة لجميع بقاع العالم

ومش عايزين ننسى انه دخل فى صنعه خشب المركب اللى جه من الشجرة اياها

..........................

....................

وستظل هى الشاهد على غباء نوع البشر ككل

القصة لم تنتهى وستظل قطع الخشب تلك التى تفرعت من الشجرة تشهد مذابح
ودموية الى الابد

والسؤال دلوقتى مش ازاى نوقف المجازر دى لأنها مش هتقف حتى لو لم يتبقى على
الارض سوى اتنين من البشر

السؤال دلوقتى يا ترى الخشب ده هيستخدم فى ايه تانى علشان يقضى على بشر
اكتر ؟

متهيألى دلوقتى السؤال اللى بيقول ليه ادم يغلط واحنا نلبسها ملوش معنى

لأن احنا كمان عندنا شجرة معرفة الخير والشر لكن دايما كنا بنختار الشر

ومش عارف اقولكم سلام ولا مش سلام بس فعلا اللى يبص على الارض خلال تاريخ
البشرية كله يقول ان الحيوانات عندها عقل اكتر من البنى ادم ...... ياليتنى
كنت حيوان

الله عليك يا ابرام رائع رائع
تسلم ايديك ياهندسه موضوع جميل

ربنا معاك ويخليك

ميرسى يا نورا ربنا يخليكى انتى

انا بس نسيت اقول ان دى قصة لواحد صحبى بردو وشكرا

ابرام بجد مش عارفة اقولك ايه. بجد لساني عاجز عن شكرك علي القصة دي
ميرسي اووووووووووووووووووووي

بس تعرف في الاخر انا كنت نسيت ان الحكاية اصلا عن اننا بنسأل ليه ادم يغلط واحنا نتحمل غلطه هههههههههههههه
حلوة بجد يا ابرام ربنا معاك ومع صاحبك دة اللي افضاله زادت علينا اوي
هههههههههه

ميرسى يا ميفو ربنا يخليكى يا قمر الشكر ليه هو طبعا

وفعلا انا توهت شوية ف النص بس القصة تستحق القراءة لآخر سطر

وميرسى ع مرورك مرة تانية

» [size=18]من يعمل الخير يرجع اليه مره اخرى[/size]
» عمل الخير
» مساء الخير تكفي للصلاة؟؟؟
» صباح الخير يا بابا يسوع
» محبة الخير ومحبة الغير